Hozka batez apaldu da COVID-19agatik ospitaleratu dituzten pazienteen kopurua: atzo, 41 lagun ospitaleratu zituzten Hego Euskal Herrian, bezperan baino hamabost gutxiago. ZIU zainketa intentsiboko unitateetan 87 paziente artatzen dituzte, ostegunean bezain bat.
Aste honetako erietxeratze zenbakirik apalenetakoa izanik ere, kutsatze berrien kopurua handia da oraindik. Atzo, erraterako, COVID-19a atzemateko 8.382 proba egin zituzten Hego Euskal Herrian: horietako 969ri atzeman diete gaitza. Hala, positibo tasa %11,6koa da. Nafarroako Gobernuko Osasun Departamentuak eta Eusko Jaurlaritzako Osasun Sailak emandako informazioen arabera, Bizkaian atzeman dituzte positibo gehien, PCR eta antigeno probak kontuan hartuta: 408. Nafarroan, 213 kasu berri atzeman dituzte; Gipuzkoan, 191, eta, Araban, 137. Gainera, Hego Euskal Herrian bizi ez diren beste hemezortzi lagunei ere atzeman diete gaitza.
