Greba berezia ari dira egiten Gasteizko udaltzainak: arreta zorrotza jartzen ari dira, eta aukera txikiena ikusten dutenean, isuna jartzen dute. Azaroan bikoiztu baino gehiago egin dute isunen bataz bestekoa. Normalean, hileko 1.200 isun inguru jartzen dituzte, baina aurreko hilabetean 3.555 jarri zituzten. Isun horien diru kopuruak batuta, 410.800 euro zenbatzen dute. Hala ere, udalera ez da diru hori guztia iristen, azkar ordaintzeagatik-eta beherapenak egoten baitira.
Irailean jarri zituzten Gasteizen 2017ko zigor gutxiena: 873; eta otsailean gehiena, 1.573. Urriaren 31n hasi ziren grebarekin, eta sindikatuek eta udal ordezkariek hainbat bilera egin badituzte ere, ez dute akordiorik lortu.
Udalaren arabera, langileen %10 baino ez da ari protestan. Hori nahikoa izan da, hala ere, herritarrei ezinegona sortzeko. Izan ere, lehen oharra jasotzea beste ondoriorik ez zuten arau-hauste arinak ere zigortu egiten dituzte orain.
