Aduana Zaintza Taldeak 698 kilo kokaina atzeman ditu Zumaian, belaontzi batean, eta ontzian zeuden bi lagunak atxilotu ditu. Erresuma Batuko bandera du belaontziak.
Droga "garbitasun handikoa" dela esan dute operazioan parte hartu dutenek. Plastikozko poltsetan zuten gordeta.
Gaur jakinarazi dutenez, atzo arratsaldean izan zen operazioa, belaontzia Karibeko herrialde batetik —ez dute zehaztu nondik— Zumaiako portura iritsi zenean. Drogen aurkako nazioarteko zerbitzuek jarraipena egin zioten. 12-15 metroko ontzia da, egurrezkoa eta zaharra.
Atxilotuak Azpeitiko Epaitegira eraman zituzten. Erresuma Batuko eta Herbehereetako nortasun agiriak dauzkate.
