Hauek sinatu zuten: Euzko Langileen Alkartasunak, Euzko Alderdi Jeltzaleak, Euzko Nekazarien Bazkunak, Euzko Abertzale Ekintzak eta Gipuzko Mendigoxale Batzak, Candido Saseta komandantearen agindupean.
Agirian, Eusko jaurlaritza berehala eratzea eskatu zuten, "Aberria, Demokrazia, Askatasuna eta Justizia Soziala" helburu. Eskaera hau eta borroka latz egin eta hilabete eskasera, Jose Antonio Agirre buru zuen Jaurlaritza abian jarri zuten
Eusko Jaurlaritza eratzea eskatuz agiria sinatu zuten Eusko Gudarosteetako buruen artean, baja bat da nabarmena: Mikel Alberdi Garcia tolosarrarena. Euskal Errepublika aldarrikatzen zuen Mendigoxaleen Batzako burua zen Gipuzkoan. Bere burua independentista, antikapitalista, antiinperialista eta antifaxistatzat agertzen zuen Jagi-Jagiko Gipuzkoako adarraren gidaria, nahiago bada. 1936ko abuztuaren 8an Loiolan Eusko Gudarosteak eratu zituztenean, Alberdik sinatu zuen mendigoxaleen izenean. Abuztuaren 16an hil zuten Bidanian erreketeek, 18ra arte ezin izan zuten haren gorpua jaitsi Loiolara. Bertan egin zizkioten hileta elizkizunak; frontean eroritako lehen eusko gudaritzat jo zuten.
