Abenduaren 9an Parisen egitekoa den manifestazioko egitarauaren berri eman dute bakegileek. 11:30ean Parisko geltoki aurrean elkarretaratzera deitu dute, animazioen hasierarekin batera Euskal Herritik datozen trenei ongietorria egiteko. Ordu erdi berantago, 12:00etan, harrera egingo diote bezperan Pariseko Reaux, Fleury-Merogis eta Fresneseko kartzeletatik aterako den martxari.
Bagoaz, Sare eta Etxerat-ek azaroaren 16tik abenduaren 6ra antolatu duten Frantziako espetxeen itzuliaren lekukoa hartuko dute bakegileek martxa horren bitartez. 12:30ean, musika eta dantza “tradizionalaz” lagundurik, manifestazioa abiatuko dute. Sound System kamioi bat ere iragarri dute antolatzaileek, artista hauekin: Bad Sound System eta Fermin Muguruza, Zebda taldeko Mouss eta Hakim, Ogres de Barback taldeko Fredo, Oreka TX eta Roce raplaria. Arratsaldeko ordu bietan, manifestaldia iritsi eta mintzaldiak izango dira. Ordu erdi berantago, kantuek emango diote amaiera mobilizazioari. Gero, 17:00etatik aurrera, gaualdia antolatua dute Pariseko Euskal Etxean.
Mobilizazioaren helburuak ere oroitarazi dituzte: sakabanaketaren amaiera, gaixorik diren presoen askatzea, zuzenbide arrunta aplikatua balitz baldintzapeko askapena eskuratzen ahalko luketeen presoen askatzea, bereziki zaindua den presoaren estatusa desagertzea, eta zuzenbide arruntaren aplikazioa.
