Abertzaleen elkarlanak duen balioa nabarmendu du EAk New Yorken

Abertzaleen arteko elkarlanak duen balioa azpimarratu zuen atzo Maiorga Ramirez Nafarroako EAko koordinatzaileak, New Yorkeko Euskal Etxean ehunka pertsonen aurrean egin zuen hitzaldian. «Politikak protagonismoa hartu duen agertoki politikoari esker» Euskal Herriko gatazkarekin amaitu daitekeela nabarmendu zuen.

Azken urtean abertzaleen arteko «hamarkadetako batasun eza» gainditu dela azaldu zuen Ramirezek, eta alderdiak, sindikatuak eta eragileak «elkarlanerako gai» izan direla Gernikako Akordioaren bidez «indarkeriarik gabeko herrialde baketsua» eskatzeko.

Hitzaldi horrekin Ramirezek, Mariano Alavak eta Fernando Ibilzietak bukatutzat eman zuten astebetez New Yorken egin duten egonaldia. Hainbat eragilerekin bildu dira egun horietan, besteak beste: Alderdi Demokrata, New Yorkeko alkatetza, International Peace Institute, New Yorkeko unibertsitatea, Irlandako Etxea eta NBE.

Euskal Herrian bakea lortzeko dagoen aukeraren berri eman die EAk, eta egungo egoerara iristeko izan den prozesuaz. Hala, Miramarko Dokumentuaren, Lortu Arte Akordioaren eta Gernikako Akordioaren berri izan dute eragileek.