Bilbon akelarre antzeko bat irudikatu dute; emakume "jakintsu eta libre" gisara azaldu dira hainbat andre, Abortuaren Legearen erreformaren kontra. Donostian, berriz, Artzain Onaren katedral aurrean biluztu egin dira beste hainbat, eta Alberto Ruiz-Gallardon defendatzen ari den lege proposamenak andrazkoak "esklabotzara" kondenatu nahi dituela salatu dute. Jende asko, andreak zein gizonak, hurbildu da mobilizazio horietara.
Estatu mailako deialdia eginda zuten abortatzeko eskubidearen alde elkartu diren taldeek, eta horren harira egin dituzte mobilizazio horiek. Hainbat aldarri elizen parean egin dituzte, Eliza Katolikoak bere irizpide moralak legeetara eraman nahi duela salatzeko.
