Hildako gehienak autobuseko bidaiariak dira: 41. Adineko bidaiariak dira, Gironda departamenduko Petit-Palais herriko elkarte batekoak. Antza denez, autobusa irten berri zen bidaian. Sud Ouest egunkariaren arabera, Biarno zuten helburu. Kamioi gidaria ere zendu da.
Bi ibilgailuek su hartu dute talkaren ostean, eta erreta zendu dira bidaiari gehienak. Bizirik irten diren zortzi bidaiarietatik lau larri eraman dituzte ospitalera. Orotara, 50 lagun zihoazen autobusean, gidaria barne. Honek autobuseko atea irekitzea lortu du istripua izan ostean, eta horrela lortu dute zortzi bidaiarik bertatik irtetea.
Istripua zerk eragin duen ikertzen ari dira. Lehen datuen arabera, kamioia bide erdian geldirik zegoela jo du autobusak. Bihurgune itxi batean gelditu da kamioia trabaturik.
