Atzo erregistratu zituzten alderdiek Eusko Legebiltzarrean autogobernuari buruzko lantaldean zein txosten eta zeinen agerraldiak nahi dituzten.
AGERRALDIAK
• EH Bildu. Arnaldo Otegi ezker abertzaleko buruzagia, Alex Salmond Eskoziako lehen ministroa, Artur Mas Kataluniako Gobernuko presidentea, Juan Jose Ibarretxe Eusko Jaurlaritzako lehendakari ohia, Carme Forcadell ANC Kataluniako Biltzar Nazionaleko presidentea, Daniel Turp Parti Quebecoiseko kidea, Ainhoa Larrañaga irakaslea eta Koldo Saratxaga enpresaria.
• EAJ. Juan Jose Ibarretxe eta Jose Antonio Ardanza lehendakari ohiak, Xabier Ezeizabarrena Zuzenbidean doktorea, Montserrat Gibernau Londresko Queen Mary Unibertsitateko politikako irakaslea, Richard A. Gillespie Liverpoolgo Unibertsitateko Zientzia Politikoetako katedraduna, David McCrone Edinburgoko Unibertsitateko irakasle emeritua eta Francisco Rubio Llorente Coloniako Unibertsitateko doktorea eta Espainiako Auzitegi Konstituzionaleko epaile izandakoa.
• PSE-EE. Patxi Lopez PSE-EEko idazkari nagusia, Ramon Jauregi PSOEko ministro ohi eta Europako hauteskundeetarako PSE-EEko zerrendaburua, Jose Maria Benegas Txiki PSE-EEko kide historikoa, Alberto Lopez Basaguren, Francesc Carreras eta Javier Tajadura Zuzenbide Konstituzionaleko adituak, Jose Ramon Rekalde PSE-EEko Hezkuntza eta Justizia sailburu ohia, Joseba Arregi Teologian eta Soziologian doktore, eta Luis Castells Historia Garaikideko katedraduna.
• PP. Javier de Andres Arabako ahaldun nagusia, Javier Maroto Gasteizko alkatea, Ramon Rabanera Arabako ahaldun nagusi izandakoa, Joseba Arregi Teologian eta Soziologian doktorea, Jose A. Herce Ekonomian doktorea, Javier Corcuera Zuzenbide Konstituzionaleko katedraduna, Iñigo Mendez de Vigo EBko Espainiako estatu idazkaria, Alfredo Marco Tabar Autonomia Estatutuaren ponentea eta Fernando Garcia de Cortazar Ruiz de Agirre Historia katedraduna.
• UPD. Jose Rodriguez Mora Edinburgoko Unibertsitateko Ekonomia irakaslea, Francisco Sosa Wagner UPDko eurodiputatua, Fernando Savater idazlea eta Manu Montero EHUko errektore ohia.
TXOSTENAK
• EH Bildu. Hiru txosten eskatuko ditu koalizio abertzaleak. Bata Euskarararen egoerari buruzkoa. Bestea EAEko administrazioek Euskal Herriko beste administrazioekin dituzten harremanei buruzkoa. Hirugarrena Eusko Jaurlaritzak Nafarroako eta Ipar Euskal Herriko erakundeekin dituen harremanei buruzkoa.
• EAJ. Bi txosten eskatuko dituzte jeltzaleek. Bata Gernikako Autonomia Estatutua ez betetzeak euskal gizarteari eragiten dizkion kalte ekonomikoei eta euskal autogobernua kaltetu eta kaltetzen dituzten Auzitegi Konstituzionalaren sententziei buruzkoa. Bestea objektiboki kuantifikatzeko EAEren eta Espainiaren arteko gisa orotako harreman ekonomikoak.
• PSE-EE. Datozen egunetan emango du eskatuko dituen txostenen berri.
• PP. Hiru txosten eskatuko ditu alderdi popularrak. Bata Euskadiren balizko independentziak izango lukeen kostu ekonomikoari, gizarte kostuari eta EBrekiko harremanen kostuari buruzkoa. Bestea Espainiako sistematik at legokeen Gizarte Segurantza eredu baten bideragarritasunari buruzkoa. Hirugarrena Gernikako Estatutuaren garapenari eta falta diren transferentziei buruzkoa
• UPD. Ez du oraingoz txostenik eskatu.
