EAJ: Zergatik ezkutatzen duzue daukazuen informazioa lelopeko pankartarekin egin du AHT Gelditu! Elkarlana taldeak protesta. Taldeak adierazi duenez, Iñigo Urkullu lehendakaria Mariano Rajoyrekin eta Ana Pastor Sustapen ministroarekin hainbatetan bildu da abiadura handiko trenaz hitz egiteko. "Bilera horietan adostatutakoaren berri ez dugu", adierazi du koordinakundeak. "Gainera, proiektuari buruzko informazioaren zain daudela diote. Bileren berririk ez dutela sinestea asko kostatzen zaigu, ordea. Gure aburuz, EAJk arreta desbideratu eta gardentasunaren ardura saihestu nahi du".
Era berean, AHT Gelditu! Elkarlanak salatu du Ana Oregi Jaurlaritzako Ingurumen sailburuak ez duela proiektuaren egoera "errealaren" inguruan argipenik eman Eusko Legebiltzarreko agerraldietan, "ez eta kostuak edo finantzaketa arazoak zein diren". Koordinakundearen ustez, horrek guztiak AHTaren inguruan dagoen "ziurgabetasuna" eta "zalantzagarritasuna" handitzea baino ez dakar.
