Duela hamar egun eskualdeko prefeta, Akitaniako, Poitou-Charente eskualdeetako presidenteekin bildu zen. Bertara deitu zituzten herri elkargoetako presidenteak. Frantziako AHT xedeen aurrekontua azaldu ondoren, tokiko erakundeek finantzaketaren parte bat ordaindu beharko zutela jakinarazi zien. Hego Lapurdiko hiri elkargoak faxez ukan zuen bilkuraren berri ostiral iluntzean. Astelehenean, jakinarazi zieten 26 milioi euro ordaindu behar zituztela.
Ezohiko prozeduraren aitzinean, ezohiko agerraldia egin zuten astelehenean Baionan. Bertan izan ziren Martine Bisauta eta Bernard Causse Berdeetako kide ohiak eta gaur egun Baionako hautetsiak Greneten zerrendan; Jakes Abeberri eta Mixel Poueyts ABko hautetsiak Miarritzeko Herriko Etxean eta Georges Daubagnat Berdeetako Angeluko Herriko Etxeko hautetsia. «Afera ez da AHTren alde edo kontra agertzea, xedearen inguruan argitasuna eskatzea baizik», erran zuen Bisautak.
Eskatzen dizkioten 65 milioi euroak ordaindu ahal izateko, Hiri Elkargoak mailegua hartu beharko du. «Urtero hiru milioi euro ordaindu beharko ditugu, 40 edo 50 urtez, eta hor erabiltzen den dirua ez da bertze deusetan erabiliko» nabarmendu zuen Bisautak. Bost hautetsiek nabarmendu zuten eztabaida publikoan ez zela aipatu finantzaketaren parte bat Herri Elkargoen gain egongo zenik.
Finantzaketari buruzko kezkak plazaratu zituzten LAB sindikatuak eta ingurumenaren aldeko elkarteak biltzen dituenCADEk ere. Azken honetako presidente Victor Pachonek ohartarazi zuen Europak ez zuela inbertsio handirik eginen eta herritarrek sakelatik ordaindu beharko zutela azpiegitura.
2006ko eztabaida publikoan aditu independenteen parte-hartzea eskatu zuten. Frantziako trenbideak kudeatzen dituen RFF konpainiaren txostena zalantzan ezarri zuten. Eztabaida irailean abiatu zen eta abenduko lehen astera arte ez zen ezagutzera eman suitzar adituen txostena. Gaur egun baliatzen diren trenbidea hobetuz, 2020a baino lehen tren saturaziorik ez zela egonen jakinarazi zuten.
Hala ere, AHT bide berrien aldeko jarrera agertu zuten hautetsi gehienek, garaian Kontseilu Nagusiko presidentea zen Jean Jacques Lasserrek ere bai. RFFk hiru hilabete hartu zituen eztabaidaren bilduma egiteko. 2007ko martxoan AHT ibilbide berria egitea deliberatu zuen Frantziak. Prozedura ere finkatu zuen bertan. Behin betiko ibilbidea 2011n emanen du jakitera RFFk.
2008ko maiatzaren 28an Christian Maudet RFFko arduradunak jakitera eman zuen «menturaz ez zela geltoki berririk eginen Lapurdin».
Ikerketa berrien eske
Aurrekontuak osatzeko prozedurak erresumindu ditu hautetsiak. AHT xede orokorrean dagokien partea ordaindu beharko dute, ibilbidea ezagutu gabe. Horrez gain, xedearen alde egiteko arrazoi nagusia, Uztaritzen eraiki nahi zuten geltokia, zalantzan ezarri du RFFk. Xehetasunik ezagutu gabe, azaroa bukatu baino lehen ordaintzea eskatu die Frantziak. «Nola erranen diogu baietz finantziazioari, jakin gabe nondik pasako den eta non izanen den geltokia?», dio Jean Jacques Lasserre Hautetsien Kontseiluko presidenteak. Hirigintza Bulegoari ikerketa bat egitea agindu dio, «geltokiaren interesak, ondorioak eta trabak neurtzeko».
Jean Grenet Baionako auzapez eta Baiona-Angelu-Miarritze Herri Elkargoko presidenteak ere ikerketa bat aginduko du. «Suitzako adituak ekarri behar badira ekarriko ditugu baina xehetasun guztiak ezagutu behar ditugu aurrekontua bozkatu aitzin», nabarmendu zuen Abeberrik. Lapurdiko ibilbideafinkaturik balego, bederen «Uztaritzeko geltokia Hondarribiko aireportuarekin trukatzeko hautua» legokeela adierazi zuen ABko hautetsiak.
Aurrekontuen osaketa
«Hautetsiek ez dute deus ulertu, eskatzen dietena ez da aurrekontua osatzea, behin-behineko finantzaketan engaiatzea baizik», azaldu du Jean Stephane Devisse WWFko kide eta eztabaida publikoko antolatzaileak. Aurrekontua finkatzeko behin-betiko ibilbidea zehaztu behar da eta inkesta publikoa burutu. Anartean, RFF hitzartutako funtsak bermatu nahi ditu banketxeen engaiamendua lortu ahal izateko. «Krisialdiak dena luza dezake eta iritzi guztien arabera, egiten bada, Bordele-Hendaia arteko xedeak atzerapen handia ukanen du», zehaztu du Devissek.
14.000
AHTren aurrekontua. Frantziak abian ezarri nahi dituen AHT xede guztiak egin ahal izateko, 14.000 milioi euroko aurrekontua osatu behar du. Behin-behineko aurrekontuaren laurden bat tokiko erakundeen gain egotea nahi du Gobernuak.Inbertsio guztiak gelditu ditu SNCFk, abendura bitartean
Frantziako trenak ustiatzen dituen SNCF konpainiak inbertsio guztiak gelditu ditu, bederen abendura bitartean. Krisialdi ekonomikoaren ondorioz hartu du erabakia. AHTren eraikuntzaren ardura duen RFF konpainiak ez du xehetasunik eman nahi izan horren inguruan, baina errentagarritasuna hobetsiko du.Hirigintza agentziari ikerketa egitea eskatuko dio Lasserrek
Jean Jacques Lasserre Hautetsien Kontseiluko presidenteak AHTren ibilbideari eta balizko geltokiari buruzko ikerketa egin dezala agindu dio Hirigintza Agentziari. «Geltoki baten interesak, ondorioak eta trabak» azter ditzala eskatu dio, hautetsien iritzia jakinaren gainean plazaratu ahal izateko.Nola erranen diogu baietz finantzaketa horri, jakin gabe nondik pasatuko den eta non izanen den geltokia?»
Jean Jacques Lasserre
Hautetsien Kontseiluko presidentea
Abiadura handiko trenak lehiakorrago bihurtzen ditu herriak, eta hazteko aukera ematen die»
antonio gonzalez
Adifeko lehendakaria
