Erantzuleek duten ardura onar dezatela". Horixe eskatu du Aingeru Zudaireren anaiak, Raul Zudairek. Joan den ostiralean epaileak artxibatu egin zuen kasua. Zudaireren senideek, ordea, berriz zabaltzeko eskatu dute. Helegitea aurkeztu dute. "Ez da istripu bat izan. Agintariena da ardura; murrizketak agindu eta Poliziaren bortizkeriari babesa ematen dioten agintariena". Hurbil-hurbiletik eman zioten pilotakada Zudaireri. Ondorioz, bere eskuineko begiko ikusmena galdu du. Ez hori bakarrik. "Psikologikoki hartu duen kolpea handia izan da", azaldu du gaztearen amak, Martina Borgek. Begia ere galtzeko arriskua duela azaldu du. "Begiari eusten dioten hezurretan ere jaso zuen kolpea".
Datorren astean, ekainaren 26an, elkarretaratzea eginen dute Atarrabian (Nafarroa) Zudaireri elkartasuna agertzeko eta haren auziaren inguruko ikerketak berriz martxan jartzeko eskatzeko. 19:00etan izanen da, udaletxearen aurrean. Herriko etxean, hain zuzen, gaiari buruzko mozioa eztabaidatuko dute egun horretan. Zudaire ez zen Espainiako Poliziaren oldarraldiaren ondorioz kolpeak jaso zituen bakarra. Gaur goizean bi epaiketa izan dira Iruñean, bertze hiru pertsonak aurkeztu salaketen harira. Salaketa horietako bat Sabino Cuadra Amaiur koalizioko diputatuarena da. "Nafarroan defizit demokratikoa dugu; bai eta justiziarena ere. Errepresioa jasaten dute protesta egiten dutenek", salatu du Cuadrak.
