Aitatasunagatiko baimena 15 egunera luzatu dute Hego Euskal Herrian

192 diputaturen babesarekin onartu du Espainiako Kongresuak Emakume eta Gizonen arteko Egiazko Berdintasun Legea; hau da, PPkoek soilik eman dute kontrako botoa.

Zenbait berritasun ekarriko ditu lege berriak Euskal Herriko zenbait lekutara, zehazki, Araba, Bizkaia, Gipuzkoa eta Nafarroara. Besteak beste, aitatasunagatiko baimena 15 egunera luzatuko du. Egun 3 egunekoa da. Lapurdi, Nafarroa Behera eta Zuberoako gizonezkoek 2002tik dute aita izaten direnean 15 eguneko baimena hartzeko aukera, baina erdiek soilik baliatzen dute. Gainera, 6 urteko epean hilabetera luzatuko dute Hego Euskal Herrian aitatasunagatiko baimena.

Beste arlo batzuetan ere izango du eragina lege berriak, hala nola, 250 langiletik gora dituzten enpresetan berdintasun planak egin beharko dituzte, eta enpresa handien administrazio kontseiluetako kideen %40 emakumezkoak izan beharko dute 8 urteko epean.