Aitor Esteban izango da Eusko Alderdi Jeltzalearen Bizkaiko zerrendaburua abenduko Espainiako Gorteetarako hauteskundeetan. Harekin batera izango dira Kongresurako hautagai Pedro Azpiazu, Pilar Ardanza, Javier Aldamiz, Ana Hormaetxe, Joseba Escribano, Idoia Sagastizabal eta Elixabete Uribarri. Senaturako, berriz, Jose Maria Cazalis, Nerea Ahed eta Maria Dolores Etxano aurkeztuko dira. Gaur aurkeztu dute zerrenda, Bilbon.
Estebanen aburuz "asko dago jokoan", eta beharrezkoa da "Euskadiren ahots propioa" Madrilen entzunaraztea. Hori, jeltzaleek bermatzen dutela gaineratu du. Izan ere, bai PPk bai PSEk "Madrileek agindutakoa" betetzen dutela zehaztu du.
Ildo beretik mintzatu da BBBko buru Itxaso Atutxa. Bere esanetan "Euskadiretzat oso txarra da" Espainiako Gobernua gehiengo osoz eratzea. Hori horrela denean, ez baitute beste inoren botorik behar, eta ondorioz, "ahaztu" egiten dituzte.
