"Ohiturak errespetatu nahi ditugu; ez da ezer aldatuko", adierazi du Jean Rene Etxegarai Baionako auzapezak, gaur, besten egitaraua aurkezteko Lounge Kafe ostatuan emandako prentsaurrekoan. Alta, Baionako bestak zenbait berrikuntzarekin datoz aurten. Eguneko egitaraua indartu nahi izan dute, eta bestazaleen segurtasunari ere garrantzia eman nahi izan diote. Bestalde, hogei urtez besta batzordeko lehendakari izandako Andre Behotegi oroituko dute bestetan, igandean zendu baitzen. Aitor Servier Azkaineko bertsolari gazteari egokitu zaio besten hasieraren ondoko bertsoa botatzea.
Baionako besta batzordeko lehendakari Henry Lauquek azaldu duenez, eguneko egitarauari garrantzia emateko, eguerditan Festiv'cuivres txarangak alaituko ditu Baionako karrikak, Leon erregearen agurraren ondotik. Bestalde, Tremplin Baiona Live 2014 izeneko egitasmoa jarri dute abian aurten. Eskualdeko talde hasiberriek izan dute lehiaketara aurkezteko aukera, eta irabazleek ortzegunetik larunbatera joko dute, 20:30etik hasita, Askatasunaren Plazan. Talde irabazleak Magnums, Dougz eta Alchim-x dira.
Karrikaldiak urteroko lekua izanen du Baionako bestetan. Ortzegunetik igandera Jacques Portes plaza euskarazko dantza eta kantuek hartuko dute. 16:30etik 19:00etara ikusgarriak eskainiko dituzte, eta, ondotik, herritarrek hartuko dute dantza eta kanturako beta. Bertzeak bertze, Aire Ahizpak, Zortzi Buru eta Santutxuko Gaztedi taldeak parte hartuko dute Karrikaldian.
Gazteen aldetik ere bada berrikuntzarik. Urteroko gazte eguna antolatzetik harago joanen dira aurten, eta txosna gunea zabalduko dute Patxa plazan. Ondoko egunetan zehaztuko dute egitaraua.
Bertzalde, Baionako udaletxeak segurtasunean egiten duen lana nabarmendu du Jean Rene Etxegarai auzapezak. Horretarako, hiru atseden gune jarriko dituzte bestetan zehar. Hiriko errepideak itxiak egonen dira besta dagoen bitartean, eta garraio publikoa erabiltzeko aholkatu du udalak. Ingurumenaren errespetuari dagokionez, edalontzi berrerabilgarriak erabiltzeko eskatu dute. Prebentzioaren alorrean sakontzeko, bideo laburrak ere egin dituzte. Eraso sexistak, drogaren eraginpean gidatzea eta bestelako ezbeharrak saihestea da asmoa.
Les Bascos LGTBen aldeko elkarteak, bere aldetik, Txalaparta izeneko lokala zabaldu du Jacques Lafitte karrikan. Ekainetik dago lokala irekita, baina Baionako bestak zabalpenerako baliatu nahi dituzte.
