Behin-behineko akordioa lortu dute Eusko Jaurlaritzak eta Errioxako Gobernuak, eta, hala, hilaren 15etik aurrera berriro ere artatzen hasiko dira Arabako Errioxako herritarrak Logroñoko ospitalean. Akordioa bihar sinatuko dute, eta, ondoren, akordio zehatzago bat lantzeari ekingo diote, Osakidetzako iturriak aipatuz berri agentziek jakinarazi dutenez.
Behin-behineko hitzarmenaren bidez, Arabako Errioxako 10.000 herritar artatuko dituzte Logroñoko ospitalean. Heldu den ostiralean hiru hilabete beteko dira Logroñoko ospitalak utzi ziola euskal herritarrak hartzeari, bi gobernuen artean sortutako desadostasunen ondorioz.
