Hendaian, Kotte Ezenarro PSko hautagaiak erraz samar irabazi zituen igandean herri bozetako lehen itzulian, botoen %36,5ekin, eta orain, bigarren itzuliari begira garaipena segurtatu nahian, ezker abertzalearekin akordioa lortu du. Honek %12,5 erdietsi zuen. Bien artean, beraz, %49 lehen itzulian.
Jean Baptiste Sallaberrik (zentro-eskuina) %28,9ko babesa lortu zuen, Richard Beitiak (eskuina) %12,8koa. PCk (Eric Saint Martin hautagai zela) %9,1ekoa eskuratu zuen, eta ez da bigarren itzulira pasatu. Beitiak jakinarazi du ez duela bigarren itzulian parte hartuko, eta beraz, Ezenarro eta Elizalderen zerrenda eta Sallaberrirenaren kontra lehiatuko da.
Ezker abertzaleak hautetsi bat izan du azken legealdian Hendaian: Iker Elizalde. Orain, gobernura iristen badira, lau izango ditu —haietako bat, Elizalde—, euskara edo gai sozialetako batzordearen ardura luke, baita auzapezorde kargua ere.
Ezenarrok engaiamendua hartu du, baldintzak betetzen badira, herrian ikastola berria egiteko.
Azken orduko akordioak
Ziburun ere akordioa erdietsi dute sozialistek eta abertzaleek, negoziaketa luzeen ondorioz. Eneko Aldana abertzaleak Henri Duhaldeborde sozialistarekin akordioa egin du, eta ondorioz, bi zerrenda aurkeztuko dira bigarren itzulian: abertzale eta sozialistena batetik, eta Guy Poulou auzapezarena bestetik. Pouluk 1 .661 boz lortu zituen (%43,68). Aldanak 802 (%21,09) eta Duhaldeborde sozialistak 1.015 (%26,69). Lehia hertsia izanen da.
Sozialista eta abertzaleen arteko azken oreneko aliantzak izan dira Urruñan ere. Horrela, Filipe Aramendi (abertzalea) eta Renaud Lassalle sozialistak bat eginen dute Herritarrak zerrendan (22 abertzale eta 7 sozialista). Parean, eskuinak ez du akordiorik lortu eta bi hautagai ukanen ditu, Odile de Coral eta Daniel Poulou.
Miarritzen aliantzak korapilatsuagoak izan dira, azkenean bi zerrenda egonen baitira aurrez aurre. Batetik, sozialista-ekologista-zentristena, Michel Veunacek gidatuko duena, eta bertzetik Max Brissonen zerrenda, eskuineko bertze bi hautagaiak barneratuz.
Angelun buruz buru egonen dira Claude Olive UMPko hautagaia eta Jean Espilondo sozialista. Mortalena zentristak ez du inoren aldeko boza eskatu. Abertzaleek ere, bozkatzeko askatasuna utzi die bere hautesleei.
Ezkerreko balioak eta Lurralde Elkargoaren sostengua giltzarri Baionan akordiorako
Igandean egin zuten Ipar Euskal Herrian udal bozen lehen itzulia, eta datorren igandeko bigarren itzulirako aliantzak zehazteko orena da orain. Hasi dira alderdiak mugitzen, eta, Lapurdiko hiriburuan, ados jarri dira Baiona 2014 zerrenda abertzalekoak eta Front de Gauchekoak. Talde bakoitza oinarrian dituen balioei atxikiko zaie. Ezkerreko balioetan bat egiten duela onartu dute Jean Claude Iriart Baiona 2014ko zerrendaburuak eta Martine Mailfert Ezkerreko Frontearen izenean. Sergue Noguesen izenean mintzatu da, azken hau lanean baitzegoen.
Iriartek botoen %10,3 jaso zituen lehen itzulian; Noguesek, berriz, %5,92. Astelehenean programak erkatu zituzten eta akordiorako bidea zegoela ebatzi. Gauean, akordioa bermatu zuten bi taldeek. Ezkerreko balioak, zerbitzu publikoak indartzea, sare publikoa indartzea eta demokrazia parte-hartzailea indartzea da oinarrizko akordioa. Gisa berean Lurralde Elkargoaren aldarria eta euskararen sostengua. Iriartek jakinarazi duenez, Baiona 2014 zerrenda bultzatu duten kideek azken bi puntu horiek argudiatu zituzten Etxetoren zerrenda ez sostengatzeko arrazoi nagusi gisa.
Ibilmoldeari dagokionez, lehen itzuliko emaitzak errespetatuko dituztela jakianrazi dute. Irizpide horren arabera banatuko dituzte zinegotziak. Lehen bi tokiak Baiona 2014 zerrendako kideek hartuko lituzteke eta hirugarrena Sergue Noguesek.
Sylvie Durruti eskuindarra, berriz, prest dago Etxegarai zentristarekin tratua egiteko bigarren itzuliari begira, Baionan. Inkestek ematen zioten baino lau puntu gehiago erdietsi ditu Durrutik: %18,54. Oraindik ez du azaldu nolako baldintzak ezarriko dizkion Etxegarairi, bigarren itzulirako sostenguaren truk. Etxegaraik botoen %29,98 lortuta, gertu izan lezake garaipena bigarren itzulian.
Hori hala, Henri Etxeto sozialistari zaildu egin zaio auzapez izateko aukera. Hura izan zen lehen indarra, botoen %35,26 eskuratuta, baina aliantzarik ezak oztopa dezake udal gobernua osatzeko bidea.
