Alakrana Bermeoko ontziari eraso egiten saiatu dira gaur goizean Indiako Ozeanoan, baina ontziak ihes egitea lortu du segurtasun protokoloa martxan jarri ondoren. Ez da zauriturik izan, Cepesca Arrantzaren Espainiako Konfederazioak Europa Pressi jakinarazi diotenez.
Atunontziko segurtasun pribatuko langileek tiro egin dute piratak gerturatzen ari zirela ikusten, eta orduan erasotzaileek alde egin dute.
Saiakera Frantziako bi ontzik joan den asteburuan jasan zuten erasoaren toki berean gertatu da, Somaliako kostatik 300 miliara.
Alakrana 2009an 47 egunez bahituta eduki zuten piratek Indiako Ozeanoan. Geroztik Somaliako kostatik gertu lanean dabiltzan ontzietan segurtasun pribatuko langileak eramaten dituzte, piraten erasoak saihesteko asmoz.
