EAJ, EH Bildu, PSE-EE, PP eta UPD alderdietako ordezkariak mahai berean esertzea lortzea bakarrik da garrantzitsua Jaurlaritzako lehendakariarentzat, "beste garai baten hasiera", lehen aldia baita. Baina haiek guztiek elkar ulertzea beste kontu bat da. "Joan den asteazkenean baino hobeto gaude". Horixe besterik ez du esan. Diputazioekin egindako bileraren biharamuna izan zen joan den asteazkena, akordioa egon zela eta ez zela EAJren eta EH Bilduren arteko hika-mika sortu zenean. Ordutik, ordea, Jaurlaritzak diputazioekin defizita malgutzen denean diru gehigarriarekin zer egin hitzartu du, eta, beraz, urrats bat aurrera egin dute.
Atzokoari begira, berriz, krisi ekonomikoaren eta haren ondorioen diagnosian bat egin dute alderdiek, eta handik atera beharra dagoela iritzi diote. "Krisitik ateratzeko lehentasunak inoiz baino leku handiagoa dauka gure agendetan, eta agenda bateratuak ekintzara garamatza. Badakigu hori egin behar dugula, eta zenbat eta elkartuago egin, orduan eta eraginkorrago izango da". Nola atera erabakitzeko ordua iritsi da orain, baina ez dago oraingoz formularik. Bitariko bilerak egiten hasteaz gain, berak aurkeztutako lehentasunen agenda eman du Urkulluk.
Autogobernurako ponentzia
Ekainean zerga erreforma aurkeztuko du lehendakariak, baita zerga iruzurraren kontrako plana ere, bi proposamenak datorren urtarrilaren 1ean indarrean sartzeko asmoz. Udazkenean, berriz, autogobernuari buruzko batzordea martxan jartzekoa du, euskal eredu instituzionala aldatzeko asmoz. "Berezko arkitekturaren egokitzapena" egin nahi du, "modu kontsentsuatuan". Egoera sozial, politiko eta ekonomiko berrira egokituko den arkitektura.
