Olatu handiak izango dira asteburuan ere. Bihar arratsaldean alerta laranja jarriko dute indarrean, 15:00etan, eta gorria izango da igandeko 03:00etatik 09:00etara. Arrisku handiena 06:00ak aldera izango da, itsasgora orduan baita. Bermeoko portua bihar arratsaldean itxiko dute astelehenera arte, eta kostaldeko gainerako portuetan ere neurriak hartuko dituzte.
Baionan uholdeak izan dituzte goizaldean. 05:00ak aldera, Errobiko eta Aturriko inguruak urpean geratu dira. Ibaiak hazita doaz azken egunetako euriteengatik, eta marea biziek bat egin dute horrekin. Baiona Ttipiko kale batzuetan sartu da ura; hamabost bat zentimetro. Herriko etxeak ohartarazi du itsasgora izango dela arratsaldean ere, 17:00etatik aurrera, eta ibai ingurutik autoak kentzeko agindu du.
