Bero handia espero da gaurko Euskal Herri osoan. Goiz-goizetik tenperatura beroak izan dira, eta, Euskalmetek jakinarazi duenez, 35 gradu ingurura irits daitezke termometroak Hego Euskal Herrian. Hegoaldean hortik gorakoak ere izan daitezke, Nafarroa eta Araba hegoaldean bereziki. Orduek aurrera egin ahala kostaldean goizeko hego haizea ipar-ekialdeko haizeak ordezkatuko duela uste du Euskalmetek, eta beroa apur bat apalduko dela. Zeruan urdin egongo da egun guztian. Ikustekotan, mendebaldeko inguru menditsuenetan ikusiko dira laino bakan batzuk. Hego haizeak, tenperatura beroek eta hezetasun faltak suteak izateko arriskua areagotu egiten dutela ohartarazi du Eusko Jaurlaritzaren meteorologia agentziak.
Meteofrance agentziak antzeko eguraldia aurreikusi du Ipar Euskal Herrian ere, baina uste du tenperaturak hainbeste ez direla igoko. Tenperatura beroenak 30-31 gradu ingurukoak izango dira inguru horretan.
