Eusko Jaurlaritzako Segurtasun Sailak jakinarazi duenez, biharko alerta laranja ezarri du Araban, Bizkaian, eta Gipuzkoan. Tenperatura handiengatik ezarritako alerta 12:00etatik 21:00etara egongo da indarrean; izan ere, espero da kostaldean eta Iragate inguruan tenperatura maximoa 37ºC ere izatea, Kantauri barnealdean 39ºC inguru eta Ebro ondoko eskualdean 38 ºC. Baso suteak gertatzeko arriskuagatik ere ezarri du alerta, eta 12:00etatik 00:00etara egongo da indarrean.
Ostiralerako, ordea, abisu horia ezarri du 12:00etatik 19:00etara. Tenperatura freskatu egingo da, baina artean ere bero egingo du: baliteke tenperatura maximoa 35ºC ingurura ere iristea Ebro ondoko eskualdean eta Iragate aldean, 30ºC ingurura Kantauri barnealdean eta 25ºC ingurura kostaldean. Suteak izateko arriskuagatik ere egongo da abisu horia Ebro ondoko eskualdean eta Iragate aldean, 00:00etatik 19:00etara.
