America 66 erregimentuaren bueltan zalaparta piztu da azkenaldian. Erakusketa izan zen lehenik, eta ekitaldia izan zen atzo. Nafarroako Parlamentuak babestuta, Espainiako Defentsa Ministerioak erregimentua goraipatu zuen Iruñean, Antoniutti parkean, 250 urte bete dituela eta.
Espainiako banderaren zina egiteko ekitaldian, 400 lagunek parte hartu zuten. Egitasmoarekin bat egin zutenen artean daude Carmen Alba Espainiako Gobernuaren Nafarroako ordezkaria, Sergio Sayas UPNko parlamentaria eta Pablo Zalba PPko eurodiputatua.
Angel Atares erregimentuko koronela zina egin zutenengana joan zen. Esan zien eurek egindakoa "konpromiso pertsonala" izateaz gain erregimentuan daudenentzat "arnasarik onena" dela. Gaineratu zuen gaur egun America 66 erregimentua "unitate moderno bat" dela, "konstituzioan biltzen diren Espainiako herriaren balioekin guztiz identifikatzen dena".
Sinadura bilketa, erakusketaren aurka
America 66 erregimentuaren inguruko erakusketa ez ezartzeko eskaerak ugariak izan ziren. 25.000 herritar baino gehiago agertu ziren egitasmoaren kontra, eta bertan behera uztea galdegin zuten, Memoria Historikoaren Legea urratzen zuelako eta 1936ko gerrako biktimak iraintzen zituelako. "Moldaketa batzuk" egin zituzten orduan erakusketaren antolatzaileek: frankismoarekin lotura zuten ikurrak kendu zituzten, kasurako.
