Goizeko zortzietarako artzainaren omenez egindako monumentuan ziren hainbat lagun, Nafarroako Pirinioetatik transhumantzian heldu ziren artaldeen sarrera ikusteko. Jose Aguas Ameriketan artzain ibilitakoak bota du ardiak sartzeko abisua ematen duen tiroa. 80 urte ditu Aguasek, eta oraindik ere artzain lanetan dabil.
Behin artaldeak sartuta, artzain ogi-mamiekin hamarretakoa egin dute jaira bildutakoek. Ameriketan lanean izandako artzainak bildu dira festan, Euskal Herrira itzulitakoak eta Amerikan geratutakoak, guztira 450 lagun inguru elkartu dira.
Zortzigarren urtea da jaia ospatzen dutena. Ospakizun eguna Cadreitako jatetxe batean egindako bazkariarekin bukatu dute.
