Aireko arin bat erori da eguerdian Amurrio inguruan (Araba). Barruan bi lagun zihoazela zabaldu dute berri agentziek: hil egin da haietako bat, eta oso larri dago bestea. Eguzkialde delako eremuan gertatu da ezbeharra. Lekuan dira ertzainak, anbulantziak eta suhiltzaileak.
Loiuko aireportuko kontrolgunetik jaso dute abisua larrialdietan, 12:40an. Jakinarazi diete aireko bat erori dela Amurrio inguruan, A-624 errepidearen alboan. Pilotuak deitu du aireportura; adierazi du hegazkinaren motorrak akatsen bat zuela, eta Loiun larrialdiz lurreratzeko baimena eskatu du. Ordea, hara heldu aurretik jausi da.
AENAk baieztatu du Loiutik bertatik abiatutako airekoa zela. Hainbat hedabidek zabaldu dute pilotu eskola bateko hegazkina dela eroritakoa. Irakasle bat eta ikasle bat dira, haien arabera; 27 eta 20 urte dituzte.
