Gaur goizean gelditu da aske Ander Geresta Azurmendi (Gabiria, 1978) preso goierritarra, Monterroxoko (Lugo, Galiza) kartzela atzean utzita. Frantzian eta Espainian, guztira, hamasei urte egin ditu espetxean. Harrera beroa egin diote kanpoan zain zituen senide eta lagunek.
2000an atxilotu zuten Geresta, Bordelen (Frantzia), Jendarmeekin izandako tiroketa bat tarteko. Lehen epaiketan hamabi urteko kartzela zigorra jarri zioten, baina kasua ikuskatu zuen beste epaitegi batek hamaseira igo zuen zigorra.
Frantzian zigorra bete zuen urteetan hainbat arazo izan zituen presoak. Moulins-Yzeureko kartzelan pasa behar izaten zituzten miatzeak zirela eta, gose eta egarri greba egiteko erabakia hartu zuen gabiriarrak. Protesta gogorraren ondorioz, ospitalera ere eraman zuten. Hainbat euskal erakunde harremanetan jarri ziren kartzelako zuzendaritzarekin, presoenganako tratua hobe zezatela eskatzeko; zuzendariak entzungor egin zuen. 2012ko maiatzean espainiaratu zuten, eta, geroztik, hainbat espetxetatik igaro da.
