Andoni Hernandez Ibarluzea leioar iheslaria hil da Baionan, erietxean zegoela. 1987an egin zuen ihes etxetik, emaztearekin. Hasieran Frantziako Estatura joan zen, gero Uruguaira. Frantziara itzuli zenean, Pauen atzeman egin zuten, ETArekin lotuta, eta zenbait tokitan konfinatuta egon zen. 1995ean beste hainbat euskal iheslarirekin batera konfinamendua hautsi zuen. 1998an berriro atxilotu zuten, baina aske geratu zen. Arbonan (Lapurdi) bizi zen.
Sortuk elkartasuna agertu dio sendiari, eta gatazkaren konponbidean pausoak emateko eskatu du. "Andoni, preso eta iheslarien kolektiboko gainerako kideen modura, Euskal Herriko gatazkaren konponbidean eragile politiko aktiboa izan da. Berriro esatera gatoz bakerako garai berriak eta gatazkaren konponbideak preso eta iheslariak Euskal Herriratzeko politikak behar dituela".
