Euskal Kazetarien Elkarteko eta Kazetarien Euskal Elkargoko epaimahaiak egin du aurtengo saridunen aukeraketa. Ane Irazabal berriemailearentzat izan da sari nagusia, gerra guneei buruz informatzen egindako lanagatik. Batez ere, Ekialde Hurbilean ibilia da Irazabal, eta errefuxiatuen krisiaren berri ematen aritu da azken urteetan hainbat komunikabidetan, besteak beste, BERRIAn.
Irazabal ez da, ordea, azaroaren 20ko ekitaldian izango den bakarra. Gervasio Sanchezi emango diote adierazpen askatasunaren Jose Maria Portell saria, eta Mariano Ferrer eta Iñaki Iriarte kazetari beteranoek jasoko dute Ibilbide Profesionalaren saria. Ferrer Egin egunkariaren lehen zuzendaria izan zen, eta Iriarte, Deia egunkariarena.
Zakilixut personaiak 40 urte bete berri dituela eta, Antton Olariaga marrazkilariari ere omenaldia egitea erabaki du elkargoak.
