Gipuzkoako Foru Aldundiak Gu, jatorri anitz, herri bat izeneko dokumentala aurkeztu du. Juanba Berasategi egile pasaitarrak zuzendu du, eta aniztasunari buruzko eztabaida sustatzea dute helburu. Marcos Nanclares Diputazioko kideak azaldu duenez, Gipuzkoa eta Euskal Herria oso aniztunak dira jatorri, kultura, hizkuntza, erlijio eta identitateari dagokionez, eta aniztasun hori kudeatu beharra dago. Horregatik, helburua garbia da: "Dokumentalaren bidez eztabaida eta gogoeta eragin nahi dugu: nola kudeatu behar dugu aniztasuna kohesio elementu izan dadin?". Gipuzkoako Foru Aldundiak oso argi du aniztasuna balio positiboa dela. "Ez da mehatxua; aitzitik, aberasgarria da eta, kudeaketa egoki baten bitartez, elkarbizitzarako elementu bihur daiteke".
Dokumentalean mota guztietako iritziak daude, aniztasunarekin nolabaiteko lotura duten pertsona asko agertzen dira, baina erantzunik ez dagoela esan du Nanclaresek: "Erantzun hori denon artean bilatu behar dugulako, denon artean eraiki. Dokumentalak galdera egiten du, eta Gipuzkoako jendarteari dagokio eztabaidatzea eta erantzuna bilatzea".
Dokumentala hilaren 8an estreinatuko dute, Donostiako Antzoki Zaharrean, 19:00etan. Dena den, gerora ere emango diote erabilerarik lanari, hainbat udal eta gizarte eragilerekin hitzarmena egin baitu diputazioak: "Dokumentala hainbat herritan jorratuko dute, eta ikus-entzunezkoa ikusi ondoren eztabaidak sortzea da gure xedea".
