COVID-19aren transmisio kurbak beheranzko joera apala marraztu du apirilaren 23tik, baina oso mantso ari da apaltzen, eta, azken hiru egunetako datuak aintzat hartuta, ez dirudi berehalakoan bizkortuko denik. Hego Euskal Herrian, beste 809 positibo atzeman zituzten atzo Osakidetzak eta Osasunbideak, bezperan baino 30 gehiago, eta maiatzaren 3an baino 198 gehiago.
Positibo tasa ere handitu da apur bat: %5,8 da orain, atzo 13.965 PCR eta antigeno proba egin ostean.
Herrialdeka, 66 kasu atzeman dituzte Araban, 358 Bizkaian, 237 Gipuzkoan, eta 136 Nafarroan.
Ospitaleen egoerari dagokionez, COVID-19arekin kutsatutako beste 50 lagun erietxeratu dituztela jakinarazi du Osakidetzak. Uneotan, 183 paziente larri daude Araba, Bizkai eta Gipuzkoako ZIU zainketa intentsiboetako unitateetan.
