Eusko Legebiltzarreko Bozeramaileen Batzordeak gaur jakinarazi duenez, hilaren 26an izango da bozketa. Aurrekontu proiektua Jaurlaritza itzuli edo ez erabakiko dute.
Lehenik, Jaurlaritzak aurrekontu proiektua aurkeztuko du; ondoren, taldeek euren argudioak emango dituzte, zuzenketen alde edo kontra. Bukaeran egingo da bozketa.
EH Bilduk eta PSE-EEk osoko zuzenketak aurkeztu dizkiete aurrekontuei, eta UPDk bihar jarriko du berea. Anton Danborenea PPko legebiltzarkideak gaur esan du "gaur gaurkoz" osoko zuzenketa aurkeztuko dutela; astelehenean 12:00etan amaitzen da horretarako epea.
Lehendakariak EAEko zerga sistema erreformatzea, zerga iruzurraren aurkako neurriak martxan jartzea eta aurten sor litezkeen diru sarrera berriak adostea proposatu die oposizioko taldeei aurrekontuetan akordioa lortze aldera helarazitako dokumentuan. Proposamen horrek, baina, ez du lortu oposizioaren eskariak gogobetetzea.
