Euskal Meteorologia Agentziak adierazi zuen uztaila «oso lehorra» izan zela, eta hori Arabako, Bizkaiko eta Gipuzkoako urtegien betetze mailan nabaritu da: %70etik behera jaitsi da; hain zuzen, %69,4koa da. Trantsizio Ekologikorako eta Erronka Demografikorako Espainiako Ministerioaren datuen arabera, 175 hektometro kubo ur dituzte EAEko urtegiek. Azken hamarkadan aste honetako batez bestekoa 188 hektometro kubokoa izan da. Iaz 183,3 hektometro kubo ur zituzten; hau da, betetze maila %72,6koa zen.
Uribarri Ganboakoa (Araba) da EAEko urtegirik handiena. 146 hektometro kubo ur hartzeko gaitasuna du, eta uneotan 101 ditu bilduta; hau da, betetze maila %69koa da. Urrunagakoa da (Araba) bigarren handiena. 72 hektometro kubo ur har ditzake, eta 48 ditu orain: betetze maila %66,6ko da. Albinako urtegian, Araban, hiru hektometro kubo ur daude bilduta; hau da, betetze maila %60koa da.
Ibai Eder urtegiaren (Gipuzkoa) egoera hobea da. 11 hektometro kubo ur hartzeko gaitasuna du, eta %82raino dago beteta. Urkulukoa (Gipuzkoa) %80raino dago beteta.
