Gaur hasi du Kepa Landa abokatuak herriko tabernei dagokien zatiaren defentsa. Elkarte horiek HBren jabetzakoak zirela izan zen fiskalaren argudioa haien aurkako neurriak eskatzeko. Iruinek esan bezala, HB bide penaletik epaitu ezin bada, ezin da haien aurka jo.
Perituen inpartzialtasuna auzitan jarriz ekin dio ondorioen irakurketari. "Perituak parte aktiboa izan dira, eta kontzienteki esan dute gezurra gainera", esan du Banaka SAren inguruko txostenei buruz. Halaber, nabarmendu du poliziek onartu dutela instrukzioan ez zutela ikertu herriko tabernarik banaka: "Instrukzioa porrota izan da, eta epaiketa ere bai".
Enpresen inguruan, galdera egin du Landak: "Poliziak ez al du ikertzen, beren hitzetan, komando bat baino arriskutsuagoa dena? ETAren finantzaketa osoa bada...".
Adolfo Araizek hartu du hitza hurrena, herriko tabernen defentsa egiteko: "Armak aurkitu dira herriko batean, beraz besteetan ere egon litezke', diote. Baina ez dute armarik aurkitu herriko batean ere". Halaber, salatu du finantzaketaren ordez, "babes logistikoa" egozten dietela orain herriko tabernei: "Defentsa eskubidea urratu da".
Akusazioa zehazgabetasunez aritu dela salatu du Araizek: "Herriko taberna ez da jabetza konkretu baten definizioa. Zer da bahitzeko eskatu dutena?".
Bihar da amaitzekoa ahozko epaiketa, saioa 09:00etan hasita.
