Jon Abril Aralarreko koordinatzaileordeak esan du bere alderdia ez dela sartuko Bildu koalizioan, euren planteamendua "inoiz" ez dela izan hori. "Beste kontu bat da Bildurekin edo Bilduko alderdiekin elkarlanean aritzea", adierazi du Abrilek gaur, Radio Euskadin.
Ezker abertzaleak, EAk eta Alternatibak Espainiako hauteskundeetarako abertzaleen aliantza bat egitea proposatu diete EAJri eta Aralarri. Hori aztertzeko prest agertu da Aralar.
Dena dela, Abrilen arabera, "proiektu politikoa da garrantzitsuena, ez siglak", eta azaldu du Aralarren egitekoa "etorkizuneko ezker abertzaleak nolakoa" izan behar duen hitz egitea izango dela.
