Jokin Aranalde eta Aitor Zubillagaren aurkako euroaginduei buruzko informazio gehiago eskatu ditu Paueko epaileak. Espainiaratze eskaerak berriro aztertuko ditu Paueko auzitegiak irailaren 10ean. Erabakia "gutxienekoa" dela dio Amaia Rekarte iheslarien abokatuak.
Ibon Fernandez Iradi euskal presoaren aurkako bi euroaginduak, haatik, onartu ditu. Espainiaratua izan aitzin, Frantziako lurraldean beharko du bete zigorra.
Iragan asteartean aztertu zituzten Aranalde, Zubillaga eta Beñat Atorrasagasti hiru iheslari politikoen eta Fernandez Iradiren Espainiaratze eskaerak, Pauen. Laurogei bat lagun bildu ziren elkartasuna adieraztera. Paueko Auzitegiak ez du onartu Atorrasagasti iheslari politikoaren aurka Espainiak egindako euroagindu eskaria. Epaileak forma akatsak atzeman ditu euroagindu eskarian, eta ez du onartu.
Euroagindu horien salatzeko, manifestazioa eginen dute larunbatean, Baionan. Errepresioa bukatu, bake prozesua orain lelopean eginen da protesta, 16:00etarik aitzina, Euskaldunen plazatik haste. Dozenaka eragile politiko eta sozialek dute harekin bat egin.
