EAk, Aralarrek, Alternatibak eta ezker abertzaleak gaur goizean Bilbon eman duten prentsaurrekoan bere gain "erantzukizun osoa" hartzeko eta dimisioa emateko eskatu diote Rodolfo Ares Eusko Jaurlaritzako Herrizaingo sailburuari. Aresek atzo egindako agerraldia "ihesaldi politikorako ariketa hutsa" izan zela uste dute, eta haien arabera, "ez zen gai izan" gertaeren inguruko "bertsio sinesgarria" emateko.
Atzo Rodolfo Ares Herrizaingo sailburuak bere gain hartu zuen Cabacasen heriotzaren "erantzukizun politikoa", Eusko Legebiltzarrean egindako agerraldian, baina esan zuen ez duela dimisioa emango.
"Informazioa ezkutatu zuen eta lekuko zein kaltetutako lagunei errespetu falta izugarria erakutsi zien", gaineratu dute lau alderdiek. Cabacas hil den arte Eusko Jaurlaritzak "aurpegia eman ez izana oso larria" dela diote, eta ondoren gertaerak "manipulatzeko ahaleginetan" aritu dela nabarmendu dute.
Amaia Agirresarobe (Alternatiba), Dani Maeztu (Aralar), Maribi Ugarteburu (ezker abertzalea) eta Unai Ziarreta (EA) izan dira prentsaurrekoan.
Lau alderdiek kritikatu dute gertaera horiek errepika ez daitezen Aresek ez dituela "bermedun neurriak" proposatu. Gainera, Legebiltzarrean agerraldia egiten ari zen bitartean hainbat ertzainek Bilbon prentsaurreko bat eskaintzen ari zirenen kontra egin zutela salatu dute.
Horrekin batera "ikerketa gardena eta zorrotza" abian jartzeko eskatu dute, eta beharrezkoa balitz, "tartean dauden ertzainekin, arduradunekin eta arduradun politikoekin neurriak hartzeko".
Elkarretaratze isila gaur, Basaurin
Gaur Iñigo Cabacasen senide eta lagunek hamabost minutuko elkarretaratze isila egingo dute Basauriko Arizgoiti plazan (Bizkaia), 20:30etik aurrera. Iñigo Pitu beti gurekin. Ez dago eskubiderik leloa eramango dute. Basauriko Udalak bat egin du deialdiarekin.
Gomazko piloten erabilera mugatua
2013tik gomazko piloten erabilera mugatu egingo dutela iragarri zuen atzo Aresek: brigada mugikorrek eta 'bereziek' bakarrik izango dute pilotak botatzeko eskopeta 2013tik. Gaur Patxi Lopez Eusko Jaurlaritzako lehendakariak berretsi du ikerketa "amaierara arte" eramango dutela.
Nafarroako Foruzaingoko sindikatuek —APF, SPF, Afapna, CCOO, UGT eta ELAk— gomazko piloten erabilera berrikusteko eskatu dute. Datorren astean bilduko dira sindikatuak eskaera bateratu bat egiteko.
Ares Ertzaintzako sindikatuekin bilduko da gaur arratsaldean, materialean izango diren aldaketaren inguruko azalpenak emateko.
Igandean, peñen deia
Igandean peñek Cabacasen aldeko ekimenetara batzeko dei egin dute. Peñek "martxa isila" antolatu dute iganderako, Iñigo Cabacasen alde. Athletic eta Mallorcaren arteko partida baino ordu eta erdi lehenago hasiko da, Moyua plazan, 16:30ean, eta San Mames futbol zelaian amaituko da.
Horrekin batera, beste hainbat proposamen egin dituzte: partidako zati bakoitzeko 9. minutuetan isilik egotea eskatu dute, eta 10. minutuan txalo egitea. Gainera, Athletici eskatu diote egun horretan klubaren ereserkia ez jartzeko, "errespetua" erakusteko.
Athleticek minutu bateko isilunea gordeko du partida hasi baino lehen; 18:00etan hasiko da norgehiagoka.
