Ostegun eguerdiz heldu da Loiuko aireportura. Ostiralean, Bilboko Bidebarrieta liburutegian izango da, GITE Gizarte Ikerketarako Talde Eragileak antolatutako jardunaldi batean, eta larunbatean, berriz, Donostian Ipar Hegoa Fundazioak prestatutako barne ikastaro batean hartuko du parte. Herri, klase eta feminista izaeradun borrokaren ikuspegia, egun izenburupean egingo dute ikastaroa.
Gainera, Angela Davis gure laguna da! festa egingo dute igandean Bilboko Kafe Antzokian. Fermin Muguruzak bultzatutako egitasmoa da, eta parte hartuko dute Mursego, Aiora eta Piti (Zea Mays), Anari, Sorkun, Aneguria, La Basu, Xabi Solano, Broken Brothers Brass Band, Bad Sound System, Maialen Lujanbio eta Eider Rodriguezek.
Otegiri bisita
Davis Logroñora joango da gero, eta 09:30ean espetxean Arnaldo Otegi ezker abertzaleko buruzagiari bisita egiteko tramiteak egin ditu. Hala ere, Free Otegi, Free Them All mugimenduak ohartarazi du litekeena dela bisita egiten ez uztea, "aurreko esperientziak" ikusita. Davis goizean joango da Logroñoko espetxera igandean, Fermin Muguruza abeslariak eta Amaia Izko Sortuko bozeramaileak lagunduta.
