Lekarozko (Nafarroa) Aroztegia proiektuaren kontrako Aroztak plataformako hamar kide deitu dituzte deklaratzera. Aroztak taldeak jakinarazi duenez, Aroztegiaren aurkako protestengatik deitu dituzte, eta bortxa delitua egozten diete.
Luxuzko 228 etxebizitza, 126 logelako hotel bat, spa gune bat eta bederatzi zuloko golf zelai bat eraiki nahi dituzte Lekarozko herrian. Apirilaren 8an hasi ziren lanetan, Palacio de Aroztegia SM enpresak aginduta. Oraingoz, ordea, herritarrek lanak gelditzea lortu dute. Kanpaldia egin zuten lanak egitekoak dituzten lurretan, eta hamaika egun egin zituzten han, enpresako makinak handik atera arte. Hain zuzen ere, Aroztegiaren aurka egindako kanpaldiarekin lotutako ekintzengatik deitu dituzte deklaratzera hamar lagunak.
Joan den larunbatean, manifestazio jendetsua egin zuten Elizondon, Aroztegia gelditu, UGEPik ez, inposiziorik ez! lelopean.
