Palacio de Aroztegia enpresak salaketa aurkeztu du Baztango alkate Joseba Otondoren eta udaleko EH Bilduko eta Ezkerrako zinegotzien aurka, Otondok berak jakinarazi duenez. Ekainean, dozenaka lagunek kanpaldia egin zuten Elizondon, "proiektu espekulatiboaren aurka" protesta egiteko; enpresaren arabera, udalak baimena eman zien kanpaldia egiteko eta argindarra erabiltzeko, eta prebarikatzea eta dirua bidegabe erabiltzea leporatu die Otondori eta EH Bilduko eta Ezkerrako zinegotziei.
Iruñean eginiko prentsaurreko batean eman du Otondok salaketaren berri. Argudiatu du udalak plazako argindarra erabiltzeko baimena ematen diola hala eskatzen duen edonori, eta salatu du "beste urrats bat" dela Baztango ordezkari politikoen aurka abiatutako "jazarpen eta kriminalizazioan".
