Bi alderdien artean "sor daitekeen elkarlanerako dimamikari" mugarik ez diola jartzen adierazi du Hasier Arraiz EH Bilduko bozeramaileak Ahal Dugu-ko kideekin egindako bileratik atera denean. Nagua Alba Ahal Dugu-ko idazkari nagusi izendatu ostean, bilera sorta abiatu zuen Ahal Dugu-k: EAJrekin bildu zen aurrena, eta gaur EH Bildurekin elkartu da.
Albak, bilera osteko prentsaurrekoan, berretsi du EAJ Jaurlaritzatik kanporatzea dela beren helburua, "aldaketa" gauzatzea nahi dutelako, eta EAJk boterean jarraituta aldaketarik ez dagola uste dutelako. Aldaketarako aukerak badaudela uste dute bi taldeek.
Albaz gain, Lander Martinez Antolakuntza idazkaria eta Eduardo Maura diputatua joan dira bilerara Ahal Dugu-ren aldetik, eta, Arraizez gain, Oscar Matute eta Oihane Zabaleta EH Bilduren aldetik. Ordubete inguruko bilera egin dute, eta hainbat gizarte gaitan egin beharreko politiketan ados daudela berretsi dute.
Arraizek, bilera ostean, esan du "ona eta luzea" izatea espero duen harreman baten "hasiera ona" izan dela gaurko bilera: "Gai jakin batzuen inguruan akordioak lortzea posible da". Aldaketa "erreala" gertatzea nahi du EH Bilduk, eta koalizioko kideek uste dute gobernu aldaketa tresna eraginkorra izan daitekeela horretarako, baina "tresna" izango dela azpimarratu dute, eta ez helburua.
