OCU Espainiako kontsumitzaileen elkarteak salatu zuen Eroskik Eroski Basic markarekin saldutako behiki hanburger batzuek zaldikia zutela.
Frogak epetik kanpo aurkeztu zituenean, gainera, OCUk "salatu zuen produktuaren ezberdina zen beste baten argazkia" atxiki zuen, eta "akatsak zituen aztertutako produktuaren sortak".
Eroskik gogorarazi du OCUk urtarrilaren 29an plazaratu zuela txosten bat hainbat supermerkatutako hanburgerren kalitatea aztertuz, eta, horretan azaldu zutenez, Eroski Basic hanburgerretan zaldi haragia topatu zuten. Eroskik haragi hori salmentatik kendu zuen, auzia argitu artean. Carnes Selectas salatutako haragia ekoizten duen konpainiarekin elkarlanean ikerketa zabaldu zuen, eta Xenotech laborategi independenteari haragiaren azterketa egiteko eskatu zion.
Eroskik azaldu duenez, laborategi horrek ziurtatu zuen ez zegoela haragian zaldi DNArik. "Horrek esan nahi du ez zegoela iruzurrik edo kontsumitzailearenganako informazio faltarik".
