Polizia iturriek agertu dutenez, atxilotu biek nortasun agiri faltsuak zituzten, Frantziakoak zein Espainiakoak, baina horrez gain, ezer gutxi aurkitu dute miaketan: armarik ez dute atzeman, eta Kitana eta Morcillo Espainiako Poliziak egotzi bezala arma salerosketan aritzen zirela frotzen duen ezer ere ez.
Astearte gauean hasi zuen Frantziako Poliziak Kintana eta Morcillo atxilotzeko operazioa: bikotearen etxera sartu ziren Saintesen (Charente Maritime, Frantzia), Bordeletik ehun kilometrora, eta asteazken eguerdi arte miatzen aritu ziren, bikotea eta haien 6 eta 2 urteko semeak han zirela. Atzo eguerdian jakinarazi zieten ofizialki Kitanari eta Morcillori atxilotuta zeudela.
Semeak atzo arratsaldean utzi zituzten bikotearen senideen esku. Askatasunak salatu du haurrak "txantaia" egiteko erabili zituela Poliziak; hau da, atxilotuei buruzko galderak erantzun ezean umeak ez zituztela euren esku utziko egin zietela mehatxu.
Atxiloketak
Asier Kintana eta Grazia Morcillo Poitiersen dauzkate
Frantziako Poliziak atzo Bordeletik ehun kilometrora atxilotu zituen Asier Kintana eta Grazia Morcillo Poitiersen dauzkate, Polizia Judizialaren zaintzapean, Parisera eramateko zain. Hala jakinarazi dute Polizia iturriek. Era berean, bikotea beren bi semeekin bizi zen etxearen miaketa amaitu dutela jakinarazi dute iturri horiek, eta "elementu interesgarririk" ez dutela aurkitu. Atxilotuek ez zeramaten armarik eta etxean ere ez dute halakorik atzeman.
Iruzkinak
Ez dago iruzkinik
Ordenatu
