Presoen argazkiak dituzte dekorazioaren parte, begiak estalita. Dignidad y Justicia elkartearen esanetan, baina, identifikatu egin daitezke presoak, eta hori "terrorismoa goratzea" da. Gainera, bere aitaren hiltzailea ere argazki horietan ageri dela salatu du Daniel Portero elkarteko buruak. Horregatik, Efe berri agentziaren arabera, salaketa jarriko du elkarteak Espainiako Auzitegi Nazionalean, Askapeña konpartsaren kontra. Peña horretakoa da Ane Ortiz, aurtengo txupinera. El Correo egunkariaren arabera, Txori Barrote eta Kaskagorri konpartsen kontrako salaketa ere jarriko du biktimen elkarteak.
Bestalde, Espainiako Gobernuak Araba, Bizkai eta Gipuzkoan duen ordezkaritzak argazkien berri eman dio Auzitegi Nazionaleko fiskalari, azter dezan deliturik ote dagoen argazkiak erakustean. Gaiaz jardun du Juan Mari Aburto Bilboko alkatea ere, eta eskatu du "uzteko Justiziari bere lana egiten".
Aurreko urteetako Bilboko Aste Nagusietan Ertzaintza joan izan da zenbait txosnatara, presoen argazkiak kentzeko exijitzera.
