Parot doktrina ezarria zuen Jon Aginagalde presoak ere, eta aske geratu da gaur eguerdian. 29 urte preso egin ondoren, Alboloteko espetxetik (Granada, Espainia) irten da. Ostiralean Espainiako Auzitegi Nazionalak erabaki zuen doktrina ezarria zuten bederatzi preso aske uztea, eta horien artean zegoen Aginagalde. Besteak ostiralean bertan geratu ziren aske, baina, Aginagalderen kasuan, Almeriako Auzitegian zuen beste auzi batengatik gaur arte atzeratu dute haren kaleratzea, Europa Press berri agentziaren arabera.
Aginagalderi 67 urteko espetxe zigorra ezarri zioten 80ko hamarkadan. 1984an espetxeratu zuten, eta 2010erako zen kalera ateratzekoa. Doktrinarekin, 2014ra luzatu zioten zigorra.
