Amnistiaren Aldeko Batzordeen aurka Baltasar Garzonek ireki zuen 33/01 sumarioan zigortu zuten Olabarrieta, beste hogei lagunekin batera. Olabarrietak zortzi urte eman ditu preso, eta gaur irten da Caceresko espetxetik. Zain zituen lagun eta senideak.
Manifestazioa Bilbon, abuztuaren 26an
Amnistiaren aldeko manifestazioa deitu dute zenbait preso ohik hilaren 26rako Bilbon. Amnistiaren norabidean presoak eta iheslariak etxera izango da leloa, Gasteizen eta Donostian bezala. Jaietan euskal preso eta iheslariek etxean egon behar dutela aldarrikatu beharra dagoela ikusten dute manifestazioaren deitzaileek.
Huelvako espetxean, protestak
Huelvako espetxean (Espainia) dituzten euskal presoen aurkako "irain eta mehatxu gogorrak" salatu ditu Amnistiaren Aldeko eta Errepresioaren Kontrako Mugimenduak (AEM). Azaldu dutenez, espetxeko patioan ping-pongean ari ziren presoak, joan den abuztuaren 8an. Euretako batek mahaia palaz jo zuen, "nahi gabe", eta funtzionarioak hurbildu egin zitzaizkion, jotzeko keinuka.
Une horretatik aurrera, ugaritu egin ziren presoen aurkako mehatxu eta irainak, eta areagotu egin zen tentsioa. Protesta gisara, bi egunez ziegatik atera gabe egon dira presoak.
