Xantiana Cachenaut abokatuak BERRIAri baieztatu dio Plazaola aske utzi dutela haren aurkako auzia egiten den arte, epaileak hala erabakita. Kontrol judizialpean egonen da, halere, eta hainbat baldintza bete beharko ditu. Ostegunean eta astelehenean Baionako polizia etxera joan beharko du izenpetzera, eta ezin izanen da Pirinio Atlantikoetako departamendutik atera. Irailaren 15ean eginen dute bere aurkako euroagindua aztertzeko auzia, 11:30ean, Paueko Instrukzio Auzitegian.
Astelehenean atxilotu zuten Plazaola, Ziburun (Lapurdi), eta Pauera eraman zuten (Okzitania), Espainiako Auzitegi Nazionalak haren aurka eskatutako euroagindua aztertzeko.
Joan den abenduan Santiago Arrospiderekin batera askatu zutenetik kalean zen Alberto Plazaola, eta martxoan Guardia Zibila hura atxilotzen saiatu zenetik Ziburura joana zen bizitzera. Bizitza arrunta egiten zuen han.
Herritar eta eragile ugarik salatu zuten astelehenean haren atxiloketa. Erraterako, elkarretaratzea egin zuten Ziburun dozenaka lagunek, Alberto Plazaola askatu! lelopean. Oñatin ere egin zuten protesta, Sortuk deituta.
