Bilboko Aste Nagusian gertatutako eraso sexista eta "lekuz kanpoko" jarrerak salatu ditu Bilboko Konpartsetako bozeramaile Itziar Villafañezek, Europa Press berri agentziari eginiko adierazpenetan.
Villafañezek dei egin die eraso horiek jasan dituztenei txoznetara joatera, bertan konpartsetako kideek babestuko dituztela-eta. Halaber, oroitarazi du festetan ohikoak direla eraso sexistak; "bereziki, ukitu larriak gertatzen ari dira", azaldu du.
"Batzutan, zaila da salaketak jartzea eta pertsona horiek atxilotzea, baina, behintzat, erreakzioak izaten ari dira erasoek okerrera egin ez dezaten", azaldu du.
Bestalde, Aste Nagusiaren orain arteko balorazio "oso ona" egin du Villafañezek: "Jendea parte hartzen ari da eta oso pozik dago".
