Ziburu eta Seaskaren arteko liskarrak ez du etenik. Irailean Pauen iragandako auzian, epaileak Guy Poulou Ziburuko auzapezaren eskaera onartu, eta ikastolak Marinela auzoko eremuan egonen zen egun bakoitzerako 100 euroko isuna ordaindu behar zituen. Urri hilabete bukaeran, uxerra ikastolatik pasa 4.370 euroko isuna ordaindu behar zutela abisatu zien.
Egun berean, bigarren albiste bat izan zuten. Poulouk egun bakoitzeko isuna 100 eurotik 400 eurotara igo nahi zuela. Hori horrela ikastola hirugarren aldiz auzitara bidaliko zituela jakin zuten. Gaur iragan da auzia eta asteartean jakinen da deliberoa.
Elkartasun partidua
Igandean, Hernani eta Ordizia arteko Errugbi elkartasun partidua jokatuko da Hernanin. Hur Gorostiagak Seaskako zuzendariak “ahalik eta jende gehien” joatea espero du eta baita “errugbi zelaia txiki geratzea” ere.
