Lehen irudipenen arabera, AstraZeneca txertoarekin lotura izan dezake emakumearen ospitaleratzeak: odolbildu batekin ospitaleratu dute Gasteizen, eta AstraZenecarekin txertatu zuten duela gutxi. Eusko Jaurlaritzako Osasun Sailaren arabera, Farmakozaintza sareari eman diote gertaeraren berri, «txertaketarekin lotutako gertakari kaltegarrien susmoak» daudelako. Hala, ikerketa bat abiaraziko dute gertaeraren inguruan, eta txertaketaren eta odolbilduaren artean loturarik ote dagoen edo ez aztertuko dute. Une honetan, koma induzituan dago emakume hori, baina medikuak baikor mintzatu dira haren bilakaeraren inguruan.
Ospitaleratu duten gaixoak 57 urte ditu, aurretiazko patologiak ditu, eta Arabako Etxez Etxeko Laguntza Zerbitzuan lan egiten du. Duela hainbat egun txertatu zuten AstraZenecaren txertoarekin. Txerto hori hartu eta hainbat egunen ostean, gaizki sentitzen hasi zela adierazi zuen emakumeak, ondoezik sentitzen zela, eta une horretan ezustean jausi zen lurrera. Une hartatik bertatik, Gasteizko Santiago ospitalean dago, zainketa intentsiboetako unitatean.
Txertaketaren eta odolbilduaren artean egon daitekeen lotura frogatuko balitz, Araban, Bizkaian eta Gipuzkoan atzematen den lehena izango litzateke. Nafarroan, kasurako, Iruñean lan egiten zuen Espainiako armadako militar bat hil zen joan den astean, buruan odolbildu bat izan ostean. Hil baino hamasei egun lehenago txertatu zuten AstraZenecarekin. Ikertzen ari dira kasu hori ere.
