Kirio Gastearena Atarrabiako alkateak Espainiako Auzitegi Nazionalean deklaratu du gaur, eta Fernando Andreu epailearen aurrean adierazi du ez zuela "terrorismoa goratu" nahi izan, "presoen eskubideen alde egin" baizik. Urriaren 6an presoen alde egindako ekitaldi baten harira epaitzen ari dira Gastearena.
Auzitegiaren atarian Atarrabiako alkateak adierazi du urriaren 6ko ekitaldian egindako adierazpenak bere izenean egin zituela, baina ez zuela zehazki inor aipatu; zigorra betetzen ari diren presoentzat "errespetua" eskatu zuela gaineratu du.
Gastearenari babesa agertu diote Amaiurreko diputatu Sabino Cuadra eta Iker Urbinak. "Ulertezina" da haien arabera Gastearena inputatu izana, eta uste dute "kezko hesi bat" dela "UPNri eragiten dioten ustelkeria kasuak estaltzeko".
